Las Calandretas (en occitan pichona lauseta) son d’escòlas, collègis e un licèu prepausant un ensenhament immersiu en lenga occitana. Son l’equivalent occitan de Diwan pel breton, Ikastola pel basc,La Bressola pel catalan o ABCM-Zweisprachigkeit pels germanofòns d’Alsàcia-Mosèla. Totas aquelas rets se retròban dins l’estructura ISLRF (Institut Superior de las Lengas de la Republica Francesa).
Las Calandretas son d’escòlas associativas a participacion activa dels parents e laïcs. Practican l’immersion lingüistica en occitan, aital coma la pedagogia activa inspirada de Célestin Freinet e de la Pedagogia Institucionala. L’ensenhament dispensat seguís los programas de l’Educacion Nacionala, e los ensenhaires de Calandreta an accès a de formacions a l’entorn de la pedagogia Calandreta.
Calandreta dispausa d’un establiment d’ensenhament superior occitan APRENE ont son formats los professors d’escòlas Calandreta. APRENE es reconegut per l’Educacion Nacionala.
L’occitan al còr del projècte
Dins lo projècte Calandreta, la lenga d’usatge es l’occitan. L’occitan es la lenga de vida, d’aprendissatge e de comunicacion de l’establiment. Es sorsa de comunicacion orala e escricha, donc lenga de trabalh.
Mas es tanben la lenga d’un territòri e d’una cultura millenària. Los aprendissatges son ancorats dins l’environament dels mainatges. Anar veire, sortir de la classa, correspondre, son indispensablas per far viure als mainatges e als adults de l’escòla l’experiéncia de l’alteritat e de l’obertura. Lo mond comença aicí : saber, o causir d’ont se ven, es activar la coneissença e la reconeissença del Patrimòni Cultural Immaterial de l’umanitat.
« Bilingüisme, 1+1 = mai que 2 ! En aprenent doas lengas (lo francés e una lenga regionala o estrangièra), un mainatge es mai apte de n’aprene una tresena e a melhorar la mestresa las doas primièras »
JEAN-LOUIS BLENET – CO-PRESIDENT DE LA CONFEDERACIONS DE LAS CALANDRETAS
Nòstre establiment s’inspira de las tecnicas Freinet e de la Pedagogia Institucionala per permetre a cada escolan de s’espandir en respectant sa personalitat.
La pedagogia Calandreta es una pedagogia activa que balha la paraula al mainatge. L’encoratja a venir autonòm, respècta lo ritme d’aprendissatge de cada escolan e estructura la vida de grop per de règlas causidas amassa.
Cada classa utiliza atal al quotidian dels espleches pedagogics adaptats a sos besonhs tals coma lo Conselh, lo Que de nòu, las cenchas, la correspondéncia amb d’autres establiments, lo trabalh cooperatiu, l’auto-avaloracion, los talhièrs despartimentats. Gràcias a d’efectius reduches, l’establiment es en mesura d’ofrir un seguit personalizat a cada collegian/licean e li portar l’atencion que merita. Los professors seguisson los escolans tot lo long de l’escolaritat, de la 6na a la 3na, puèi de segonda a la Terminala.
