Ouvert en 2016 lo licèu Leon Còrdas prepausa a totes los liceans de perseguir lor escolaritat en immersion occitana.
Amb un taus de capitada al bachelierat de 100 % per las 2 primièras promocions e 90% per la 3na (3 promocions dempuèi l’obertura de l’establiment), lo licèu perseguís son objectiu de formar, de la segonda a la terminala, de futurs ciutadans del mond, responsables e autonòms.
L’establiment, dins la continuitat pedagogica de las Calandretas, utiliza los espleches de las Tecnicas Freinet e de la Pedagogia Institucionala.
Las classas van donc s’estructurar a l’entorn d’un grop, mas tanben un luòc puèi que los liceans investisson per l’annada un espaci que lor es dedicat. Al contra dels autres licèus diches « tradicionals », los escolans càmbian pas de classa.
Lo conselh setmanièr permet de gerir aquel espaci e lo grop dins sos projèctes de vida e d’aprendissatge, la paraula de cadun es reconeguda e mai se l’estatut de cadun es diferent. Cada classa a son professor e son animator referents qu’asseguran lo ligam amb los autres adults e dins lo respècte de las institucions.
La cooperacion entre escolanas es mesa endavant dins totas las matèrias e pendent las situacions d’aprendissatge, en balhant de sens a aqueles aprendissatges e a l’utilizacion d’aqueles espleches.
De cenchas de comportament son meses en plaça dins lo licèu. Trabalhadas amb los escolans e l’equipa pedagogica permeton als escolans de progressar dins l’aprendissatge de la vida ciutadana. Son demandadas per l’escolan concernit e validadas per la classa al moment del conselh.
Per l’aquisicion de las diferentas cenchas de comportament l’escolan a son pròpri estatut dins lo grop e se vei atribuït dels dreches de responsabilitats coma prene en carga un grop dins la classa sus un temps periescolars o encara presentar un projècte al Conselh d’administracion de l’establiment.
De cenchas de responsabilitat de cap al trabalh son mesas en plaça per permetre als escolans de progressar dins l’autonomia de trabalh per arrestar al melhor los estudis pòst bac.
Per tal de respondre a las exigéncias de l’educacion nacionala lo licèu utiliza en parallèl un sistèma d’avaloracion per nòtas.
Las cenchas avaloran la progression de l’escolan dins sa capacitat a s’investir dins son trabalh, las nòtas avaloran las competéncias de saber-far.
Un trabalh personal es favorizat amb de tempses reservats (T.A.) Trabalh Autonòm. Aqueles tempses permeton a cada licean d’utilizar un plan de trabalh que favoriza la progression personala, de desvolopar de projèctes comuns e de far viure la solidaritat e l’entraide dins la vida sociala e dins lo trabalh escolar (tutorat).
Los espleches numerics permeton uèi de crear aisidament de supòrts en lenga occitana e de beneficiar d’espleches d’aprendissatge eficaces e atrasents. (Wikis, Quizlets, livrescolaire.fr, padlets…)
